ଓଡ଼ିଶାରେ ବଢ଼ୁଛି ଆଳୁ ଚାଷ; ୨୦୨୫-୨୬ରେ ୧୬ ହଜାର ହେକ୍ଟରରୁ ଅଧିକ ଜମିରେ ଚାଷ

ଚଳିତ ବର୍ଷ ଏଯାଏଁ ୨୪୭୮ ହେକ୍ଟରରେ ଆଳୁ ଚାଷ; କୋରାପୁଟରେ ସର୍ବାଧିକ ୮୪୧୫ ଚାଷୀ ସାମିଲ

ଭୁବନେଶ୍ୱର: ରାଜ୍ୟରେ ଆଳୁ ଚାଷକୁ ପ୍ରୋତ୍ସାହନ ଦେବା ପାଇଁ ସରକାରଙ୍କ ପକ୍ଷରୁ ଚାଲିଥିବା ପଦକ୍ଷେପର ପ୍ରଭାବରେ ଚାଷ ବଢ଼ିଥିବା ତଥ୍ୟ ସାମ୍ନାକୁ ଆସିଛି। ୨୦୨୪-୨୫ ତୁଳନାରେ ୨୦୨୫-୨୬ରେ ଆଳୁ ଚାଷ ହୋଇଥିବା ଜମି ପରିମାଣ ପ୍ରାୟ ୨୧ ପ୍ରତିଶତ ବଢ଼ିଛି। ତେବେ ଚାଷୀଙ୍କ ସଂଖ୍ୟାରେ ହ୍ରାସ ଦେଖାଯାଇଛି।

କୃଷି ଓ କୃଷକ ସଶକ୍ତିକରଣ ବିଭାଗର ତଥ୍ୟ ଅନୁସାରେ, ୨୦୨୪-୨୫ରେ ରାଜ୍ୟରେ ୧୩,୨୮୯.୧୭ ହେକ୍ଟର ଜମିରେ ଆଳୁ ଚାଷ ହୋଇଥିଲା। ଏଥିରେ ୮୩,୦୯୧ ଜଣ ଚାଷୀ ସାମିଲ ହୋଇଥିଲେ।

୨୦୨୫-୨୬ରେ ଆଳୁ ଚାଷର ଅଞ୍ଚଳ ବଢ଼ି ୧୬,୦୯୭.୪୫ ହେକ୍ଟରରେ ପହଞ୍ଚିଥିଲା। ଅର୍ଥାତ୍ ଗୋଟିଏ ବର୍ଷରେ ଚାଷ ଅଞ୍ଚଳ ପ୍ରାୟ ୨୧.୧୩ ପ୍ରତିଶତ ବୃଦ୍ଧି ପାଇଛି। ତେବେ ଏହି ବର୍ଷ ଆଳୁ ଚାଷ କରିଥିବା ଚାଷୀଙ୍କ ସଂଖ୍ୟା ୫୯,୮୨୩କୁ ଖସିଛି।

ଚଳିତ ବର୍ଷ ଏଯାଏଁ ୨୪୭୮ ହେକ୍ଟରରେ ଚାଷ

୨୦୨୬-୨୭ ଚାଷ ବର୍ଷର ଏଯାଏଁ ମିଳିଥିବା ତଥ୍ୟ ଅନୁସାରେ, ରାଜ୍ୟରେ ୨,୪୭୮ ହେକ୍ଟର ଜମିରେ ଆଳୁ ଚାଷ ହୋଇଛି। ଏଥିରେ ମୋଟ ୯,୨୨୦ ଜଣ ଚାଷୀ ସାମିଲ ହୋଇଛନ୍ତି। ଅର୍ଥାତ୍ ଚଳିତ ବର୍ଷର ତଥ୍ୟ ଏଯାଏଁ ଅପୂର୍ଣ୍ଣ ଥିବାରୁ ଆଗକୁ ଚାଷ ଅଞ୍ଚଳ ଓ ଚାଷୀ ସଂଖ୍ୟା ଆହୁରି ବଢ଼ିପାରେ।

ଚଳିତ ବର୍ଷର ଜିଲ୍ଲାୱାରୀ ତଥ୍ୟରେ କୋରାପୁଟ ଆଗରେ ରହିଛି। ଏଠାରେ ଏଯାଏଁ ୧,୯୫୦ ହେକ୍ଟର ଜମିରେ ଆଳୁ ଚାଷ ହୋଇଥିବାବେଳେ ୮,୪୧୫ ଜଣ ଚାଷୀ ଏଥିରେ ସାମିଲ ହୋଇଛନ୍ତି।

ସେହିପରି କନ୍ଧମାଳରେ ୩୭୮ ହେକ୍ଟର ଜମିରେ ୧୭୩ ଜଣ ଚାଷୀ ଏବଂ ରାୟଗଡ଼ାରେ ୧୫୦ ହେକ୍ଟର ଜମିରେ ୬୩୨ ଜଣ ଚାଷୀ ଆଳୁ ଚାଷ କରିଥିବା ତଥ୍ୟରେ ଦର୍ଶାଯାଇଛି।

ଆଳୁ, ପିଆଜ ଓ ମସଲା ଉନ୍ନୟନ ଯୋଜନାରେ ଅର୍ଥ ବ୍ୟୟ

ଆଳୁ ଚାଷକୁ ପ୍ରୋତ୍ସାହନ ଦେବା ପାଇଁ ରାଜ୍ୟ ସରକାରଙ୍କ ‘ଆଳୁ, ପିଆଜ ଓ ମସଲା ଉନ୍ନୟନ’ ଯୋଜନା ଅଧୀନରେ ଅର୍ଥ ବ୍ୟବସ୍ଥା କରାଯାଇଛି।

ତଥ୍ୟ ଅନୁସାରେ, ୨୦୨୪-୨୫ରେ ₹୫୮.୪୭ କୋଟି ବ୍ୟୟ ବରାଦ ହୋଇଥିବାବେଳେ ଏଥିରୁ ₹୩୪.୯୧ କୋଟି ଖର୍ଚ୍ଚ ହୋଇଥିଲା। ଏହି ଯୋଜନା ମାଧ୍ୟମରେ ଚାଷୀଙ୍କୁ ଆଳୁ ଚାଷ ଦିଗରେ ପ୍ରୋତ୍ସାହନ ଦେବା ସହିତ ଉତ୍ପାଦନ ବଢ଼ାଇବା ଉପରେ ଗୁରୁତ୍ୱ ଦିଆଯାଉଛି।

ଅନ୍ୟପକ୍ଷରେ, ରାଜ୍ୟର ବିଭିନ୍ନ ଜିଲ୍ଲାରେ ଆଳୁ ଚାଷର ବିସ୍ତାର ହେଉଥିବାରୁ ଚାଷ ଅଞ୍ଚଳ ବଢ଼ୁଛି। ତେବେ ଚାଷୀଙ୍କ ସଂଖ୍ୟା ଓ ଚାଷ ଅଞ୍ଚଳ ମଧ୍ୟରେ ଥିବା ପାର୍ଥକ୍ୟ ଉପରେ ମଧ୍ୟ ନଜର ରହିଛି।

ବିଧାନସଭାରେ କୃଷି ଓ କୃଷକ ସଶକ୍ତିକରଣ ବିଭାଗ ସମ୍ପର୍କିତ ପ୍ରଶ୍ନର ଉତ୍ତରରେ ଏହି ତଥ୍ୟ ସାମ୍ନାକୁ ଆସିଛି।