ରମାକାନ୍ତ ଗୋଚ୍ଛାୟତଙ୍କ ନୂତନ କବିତା ସଂକଳନ ‘ଲୋହିତ ସ୍ୱପ୍ନ’

ଓଡ଼ିଶାର ଅଗ୍ରଣୀ ପୁସ୍ତକ ପ୍ରକାଶନ ସଂସ୍ଥା ବର୍ଷା ପବ୍ଲିକେସନ୍ ପକ୍ଷରୁ ଭୁବନେଶ୍ୱରସ୍ଥିତ ରେଡକ୍ରସ୍ ଭବନଠାରେ ବରିଷ୍ଠ କବି ରମାକାନ୍ତ ଗୋଚ୍ଛାୟତଙ୍କ ନୂତନ କବିତା ସଂକଳନ ‘ଲୋହିତ ସ୍ୱପ୍ନ’ ଆନୁଷ୍ଠାନିକ ଭାବେ ଲୋକାର୍ପିତ ହୋଇଯାଇଛି। ଓଡ଼ିଶାର ସାରସ୍ବତ ଜଗତର ଅନେକ ବିଶିଷ୍ଟ ବ୍ୟକ୍ତିତ୍ୱଙ୍କ ଉପସ୍ଥିତିରେ ଏହି ପୁସ୍ତକ ଉନ୍ମୋଚନ ଉତ୍ସବ ସଫଳତାର ସହ ସମ୍ପନ୍ନ ହୋଇଛି।

ଏହି ଭବ୍ୟ ପୁସ୍ତକ ଲୋକାର୍ପିତ ଉତ୍ସବରେ ସାହିତ୍ୟ କ୍ଷେତ୍ରର ପ୍ରମୁଖ ବ୍ୟକ୍ତିମାନେ ସାମିଲ ହୋଇ କବି ଓ କବିତା ସମ୍ପର୍କରେ ଆଲୋଚନା କରିଥିଲେ । ବିଶିଷ୍ଟ କଥାକାର ଓ କବି ଅଜୟ ସ୍ୱାଇଁ ମୁଖ୍ୟ ଅତିଥି ଭାବେ ଯୋଗ ଦେଇ କବିତାର ଗଭୀରତା ଓ ଏହାର ତାତ୍ତ୍ୱିକ ଦିଗ ଉପରେ ଗୁରୁତ୍ୱପୂର୍ଣ୍ଣ ବକ୍ତବ୍ୟ ରଖିଥିଲେ। ବରିଷ୍ଠ କବି ଓ ଆଲୋଚକ ଅଶୋକ ମହାନ୍ତି ମୁଖ୍ୟ ବକ୍ତା ଭାବେ ଯୋଗଦେଇ ‘ଲୋହିତ ସ୍ୱପ୍ନ’ ପୁସ୍ତକର ସମସ୍ତ କବିତା ଉପରେ ପୁଙ୍ଖାନୁପୁଙ୍ଖ ସମୀକ୍ଷା କରିଥିଲେ।
ଏବଂ ଜଣାଶୁଣା କବି ତଥା ବରିଷ୍ଠ ସାମ୍ବାଦିକ କେଦାର ମିଶ୍ର ଏହି ସଭାରେ ସଭାପତିତ୍ୱ କରିବା ସହ ସାମ୍ପ୍ରତିକ ସମୟରେ କବିତାର ପ୍ରାସଙ୍ଗିକତାକୁ ନେଇ ନିଜର ବହୁମୂଲ୍ୟ ମତ ପ୍ରଦାନ କରିଥିଲେ।

ଲେଖକୀୟ ଅନୁଭୂତି ଓ ଧନ୍ୟବାଦ ଅର୍ପଣ
ଉତ୍ସବରେ କବି ରମାକାନ୍ତ ଗୋଚ୍ଛାୟତ ‘ଲୋହିତ ସ୍ୱପ୍ନ’ ପୁସ୍ତକର ରଚନା ଶୈଳୀ, ପ୍ରେରଣା ଓ ନିଜର ଲେଖକୀୟ ଅନୁଭୂତି ସମ୍ପର୍କରେ ସୂଚନା ଦେଇଥିଲେ। ପରିଶେଷରେ କବି ତଥା ପ୍ରକାଶକ ବାଦଲ ମହାନ୍ତି ସଭାରେ ଉପସ୍ଥିତ ଥିବା ଓଡ଼ିଶାର ସମସ୍ତ ପ୍ରତିଷ୍ଠିତ ସାହିତ୍ୟିକ, ଲେଖକ ଓ ବୁଦ୍ଧିଜୀବୀମାନଙ୍କୁ ସେମାନଙ୍କର ସମ୍ମାନଜନକ ଉପସ୍ଥିତି ପାଇଁ ଆନ୍ତରିକ ଧନ୍ୟବାଦ ଓ କୃତଜ୍ଞତା ଜ୍ଞାପନ କରିଥିଲେ।