ବାରବାଟୀରେ ମହିଳା ପ୍ରଦର୍ଶନୀ ମ୍ୟାଚ୍‌: ୭ ୱିକେଟ୍‌ରେ ଜିତିଲା ଓସିଏ ବ୍ଲୁ

କଟକ, ସେପ୍ଟେମ୍ବର ୨୯: ଭାରତ ମସଲା ଓଡ଼ିଶା ଟି-୨୦ ଲିଗ୍‌–ସିଏମ୍‌ ଟ୍ରଫିକୁ ଅବସରରେ ବାରବାଟୀ ଷ୍ଟାଡିୟମରେ ମଙ୍ଗଳବାର ଖେଳାଯାଇଥିବା ମହିଳା ପ୍ରଦର୍ଶନୀ ମ୍ୟାଚ୍‌ରେ ଓସିଏ ମହିଳା ବ୍ଲୁ ଦମଦାର ବିଜୟ ହାସଲ କରିଛି। ଓସିଏ ମହିଳା ଗ୍ରୀନ୍‌କୁ ୭ ୱିକେଟ୍‌ରେ ହରାଇ ବ୍ଲୁ ଦଳ ମ୍ୟାଚ୍‌ ନିଜ ନାମରେ କରିଛି।

ଟସ୍‌ ଜିତି ଗ୍ରୀନ୍‌ ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା। ଆରମ୍ଭରୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ଦଳ ମାତ୍ର ୧୦ ରନ୍‌ରେ ୩ଟି ୱିକେଟ୍‌ ହରାଇଥିଲା। ଏହାପରେ ତନ୍ମୟୀ ବେହେରା ଓ ସଙ୍ଗୀତା ଖଡ଼ିଆ ଦାୟିତ୍ୱପୂର୍ଣ୍ଣ ବ୍ୟାଟିଂ କରି ଇନିଂସ୍‌କୁ ସ୍ଥିର କରିଥିଲେ। ଚତୁର୍ଥ ୱିକେଟ୍‌ରେ ଉଭୟଙ୍କ ମଧ୍ୟରେ ୩୫ ରନ୍‌ର ଭାଗୀଦାରି ହୋଇଥିଲା।

ତନ୍ମୟୀ ୧୫ ବଲ୍‌ରେ ୨୧ ରନ୍‌ କରି ପ୍ୟାଭିଲିୟନ୍‌ ଫେରିଥିବା ବେଳେ ସଙ୍ଗୀତା ୩୩ ବଲ୍‌ରେ ୩୦ ରନ୍‌ର ଉପଯୋଗୀ ଇନିଂସ୍‌ ଖେଳିଥିଲେ। ପରବର୍ତ୍ତୀ ସମୟରେ ମୋନାଲିଶା ରାଉତ ଓ ବିଜୟଲକ୍ଷ୍ମୀ ବେହେରା ରନ୍‌ ଯୋଡ଼ି ଦଳର ସ୍କୋରକୁ ୧୦୦ ରନ୍‌ ଅତିକ୍ରମ କରାଇଥିଲେ। ମୋନାଲିଶା ୨୮ ବଲ୍‌ରୁ ୨୫ ଏବଂ ବିଜୟଲକ୍ଷ୍ମୀ ୨୩ ବଲ୍‌ରୁ ୧୭ ରନ୍‌ କରିଥିଲେ।

ନିର୍ଦ୍ଧାରିତ ୨୦ ଓଭର ଶେଷରେ ଗ୍ରୀନ୍‌ ୭ ୱିକେଟ୍‌ ହରାଇ ୧୧୨ ରନ୍‌ କରିଥିଲା। ବ୍ଲୁ ପକ୍ଷରୁ ଜିଏମ୍‌ ଅଲକନନ୍ଦା ବୋଲିଂରେ ପ୍ରଭାବଶାଳୀ ପ୍ରଦର୍ଶନ କରି ୪ ଓଭରରେ ମାତ୍ର ୧୨ ରନ୍‌ ଦେଇ ୨ଟି ୱିକେଟ୍‌ ନେଇଥିଲେ।

୧୧୩ ରନ୍‌ର ବିଜୟ ଲକ୍ଷ୍ୟ ନେଇ ପଡ଼ିଆକୁ ଓହ୍ଲାଇଥିବା ବ୍ଲୁ ଦଳର ଓପନିଂ ଯୋଡ଼ି ଭଲ ଆରମ୍ଭ ଦେଇଥିଲା। ଅଲିପ୍ସା ବିଶ୍ୱାଳ ଓ ଶିଳ୍ପା ସ୍ୱାଇଁ ପ୍ରଥମ ୱିକେଟ୍‌ରେ ୬୮ ରନ୍‌ ଯୋଡ଼ି ଲକ୍ଷ୍ୟ ହାସଲର ମୂଳଦୁଆ ପକାଇଥିଲେ। ପ୍ରଥମ ୧୦ ଓଭରରେ ଦୁଇ ବ୍ୟାଟର୍‌ ଦ୍ରୁତ ଗତିରେ ରନ୍‌ ସଂଗ୍ରହ କରିଥିଲେ।

ଶିଳ୍ପା ୩୧ ବଲ୍‌ରୁ ୨୬ ରନ୍‌ କରି ଆଉଟ୍‌ ହେବା ପରେ ବ୍ଲୁ ଆଉ ଦୁଇଟି ୱିକେଟ୍‌ ହରାଇଥିଲା। ତଥାପି ଦଳ ରନ୍‌ ଗତିକୁ ନିୟନ୍ତ୍ରଣରେ ରଖି ଲକ୍ଷ୍ୟ ଆଡ଼କୁ ଆଗେଇ ଚାଲିଥିଲା। ଶେଷ ଓଭରରେ ଆବଶ୍ୟକ ରନ୍‌ ସଂଗ୍ରହ କରି ବ୍ଲୁ ୭ ୱିକେଟ୍‌ରେ ବିଜୟ ହାସଲ କରିଥିଲା।

ଦଳ ପକ୍ଷରୁ ପ୍ରଜ୍ଞାନ ପି. ମହାନ୍ତି ଶାନ୍ତ ଓ ଦାୟିତ୍ୱପୂର୍ଣ୍ଣ ବ୍ୟାଟିଂ କରି ୩୨ ବଲ୍‌ରେ ୨୭ ରନ୍‌ କରି ଅପରାଜିତ ରହିଥିଲେ।

ମ୍ୟାଚ୍‌ ପରେ ବ୍ଲୁ ଅଧିନାୟକ ସୁଭ୍ରା ସ୍ୱାଇଁ ଦଳର ପ୍ରଦର୍ଶନକୁ ନେଇ ସନ୍ତୋଷ ପ୍ରକାଶ କରିଥିଲେ। ତାଙ୍କ କହିବା ଅନୁସାରେ, ଦଳର ପ୍ରତ୍ୟେକ ଖେଳାଳି ନିଜ ଦାୟିତ୍ୱ ସଠିକ୍‌ ଭାବେ ତୁଲାଇଥିଲେ ଏବଂ ବିଜୟ ପଛରେ ସାମୂହିକ ପ୍ରୟାସ ରହିଥିଲା।

ମହିଳା କ୍ରିକେଟରଙ୍କ ପାଇଁ ଏଭଳି ମଞ୍ଚ ଯୋଗାଇ ଦେଇଥିବାରୁ ସେ ଓସିଏକୁ ଧନ୍ୟବାଦ ଜଣାଇବା ସହ ଆଗାମୀ ଦିନରେ ଏଭଳି ଅଧିକ ପ୍ରତିଯୋଗିତା ଓ ସୁଯୋଗ ମିଳିବ ବୋଲି ଆଶା ପ୍ରକାଶ କରିଥିଲେ। ପ୍ରଦର୍ଶନୀ ମ୍ୟାଚ୍‌ ହୋଇଥିଲେ ମଧ୍ୟ ଦଳ ଏହାକୁ ଗୁରୁତ୍ୱର ସହ ନେଇ ପ୍ରତିଯୋଗିତାମୂଳକ ଭାବେ ଖେଳିଥିବା ସେ କହିଥିଲେ।

ବୋଲିଂରେ ଉତ୍କୃଷ୍ଟ ପ୍ରଦର୍ଶନ ପାଇଁ ଜିଏମ୍‌ ଅଲକନନ୍ଦାଙ୍କୁ ‘ପ୍ଲେୟର ଅଫ୍‌ ଦ ମ୍ୟାଚ୍‌’ ପୁରସ୍କାର ମିଳିଥିଲା। ଭାରତ ମସଲାର ଡାଇରେକ୍ଟର ଶ୍ରୀମନ୍ତ ପଣ୍ଡା ତାଙ୍କୁ ଏହି ପୁରସ୍କାର ପ୍ରଦାନ କରିଥିଲେ।