ବୁମେରାଂ ହେଲା ଦଳୀୟ ଶୃଙ୍ଖଳା, ବିଜେଡ଼ିରେ ବଢ଼ିଲା ବିଶୃଙ୍ଖଳା

ନବୀନଙ୍କ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ବଢ଼ାଇଲା ବିଶୃଙ୍ଖଳା। ରାଜ୍ୟ ସଂଗଠନ ସଜାଡୁ ସଜାଡୁ ବିଗିଡ଼ିଲାଣି ଜିଲ୍ଲା ସଂଗଠନ। ନେତାଙ୍କୁ ନିଲମ୍ବନ ପରେ ଦଳ ଛାଡିଲେ ସମର୍ଥକ। ପୁଣି ତେଜିଲା ପାଣ୍ଡିଆନଙ୍କ ବିରୋଧରେ ପ୍ରତିବାଦ। ନିଲମ୍ବନ ବିରୋଧରେ ବର୍ଷିଲେ ନେତା। ଏପଟେ ବିଜେଡି କହିଛି ୬ ବିଧାୟକଙ୍କୁ ନିଲମ୍ବନ ସହ ସଦସ୍ୟତା ପଦ ରଦ୍ଦ ପାଇଁ ଆଇନଗତ ଲଢେଇ ମଧ୍ୟ ଲଢ଼ିବ।

ବାଲେଶ୍ୱରରେ ସୁବାସିନୀ ସମର୍ଥକଙ୍କ ଇସ୍ତଫା ପର୍ବ। ବିଜେଡିରେ ଶୃଙ୍ଖଳାଗତ କାର୍ଯ୍ୟାନୁଷ୍ଠନ ପରେ ବଢ଼ିଲା ବିଶୃଙ୍ଖଳା। ବୁମେରାଂ ହେଲା ୬ ବିଧାୟକଙ୍କୁ ନିଲମ୍ବନ। ବିଧାୟକଙ୍କ ସମର୍ଥନରେ ଦଳ ଛାଡ଼ିଲେ ତୃଣମୂଳ ସ୍ତର କର୍ମୀ ଓ ନେତା। ଏ ଦୃଶ୍ୟ ବସ୍ତା ନିର୍ବାଚନମଣ୍ଡଳୀ ଅଧୀନରେ ଥିବା ବାଲିଆପାଳ ବ୍ଲକର। ବାଲିଆପାଳ ବ୍ଲକ୍ ସଭାପତିଙ୍କ ସହ ଦୁଇ ଜଣ ଜିଲ୍ଲା ପରିଷଦ ଓ ୨ ହଜାର କର୍ମୀ ବିଜେଡିକୁ କରିଛନ୍ତି ବାଏ ବାଏ। ଏପଟେ କଟକରେ ବି ମେଳି । ପାଣ୍ଡିଆନଙ୍କ ପୋଷ୍ଟର ଜାଳିଛନ୍ତି ବିଧାୟକ ଦେବୀ ତ୍ରିପାଠୀଙ୍କ ସମର୍ଥକ । 

ଆଉ ଏପଟେ ସାମ୍ବାଦିକ ସମ୍ମିଳନୀ କରି ଦଳ ଓ ସୁପ୍ରିମୋଙ୍କ ଉପରେ ବର୍ଷିଛନ୍ତି ବିଧାୟକ ସୌଭିକ ବିଶ୍ବାଳ କହିଛନ୍ତି, ‘ବାପାଙ୍କୁ ବହିଷ୍କାର ବେଳେ ମୁଁ ବି ବହିଷ୍କାର ହୋଇଯାଇଛି ବୋଲି ଭାବିଥିଲି । ଯେଉଁ ଦଳ ବାପାଙ୍କ ମୁଣ୍ଡ କାଟ କରିଛି, ସେ ଦଳକୁ ପୁଅ କେମିତି ଭୋଟ ଦେବ । ଏବେ ରାଜନୈତିକ ଅସ୍ଥିରତା ଚାଲିଛି । ସମୟ କହିବ ରାଜନୈତିକ ନିଷ୍ପତି କଣ ହେବ । ସେପଟେ ବାଲିଗୁଡା ବିଧାୟକ ଚକ୍ରମଣୀ କହଁର ମଧ୍ୟ ପ୍ରତିକ୍ରିୟା ରଖି କହିଛନ୍ତି, ମୁଁ ନିଲମ୍ବନ ଆଦେଶକୁ ଗ୍ରହଣ କରିପାରୁନି । ମୁଁ ବିଜେଡି ସହ ବିଶ୍ୱାସଘାତକତା କରିନି । ବିଜୁ ଲିଗାସୀକୁ ଭୋଟ ଦେଇଛି।

ଅନ୍ୟପଟେ ବିଜେଡି ନେତା ତଥା କଟକ ମେୟର ସୁବାସ ସିଂ କହିଛନ୍ତି, ‘ଦଳ ସହ ବିଶ୍ୱାସଘାତକତା କରିଥିବା ଦେବୀ ତ୍ରିପାଠୀ ଓ ସୌଭିକ ବିଶ୍ବାଳ ଭବିଷ୍ୟତରେ ଖତ ହୋଇଯିବେ। ସେମାନେ କଟକକୁ କଳଙ୍କିତ କରିଛନ୍ତି ବୋଲି କହିଛନ୍ତି ସୁବାସ । ଆଉ ଦଳର ବରିଷ୍ଠ ଉପସଭାପତି ଦେବୀ ମିଶ୍ର କହିଛନ୍ତି, ବିଜେଡି ସମ୍ବିଧାନରେ ଶୃଙ୍ଖଳା ଭାଙ୍ଗି ଥିବାରୁ କାର୍ଯ୍ୟାନୁଷ୍ଠାନ ହୋଇଛି । ଦଳର କଲେକ୍ଟିଭ ନିଷ୍ପତ୍ତିକୁ ମାନି ନଥିବାରୁ ସଭ୍ୟ ପଦ କାହିଁକି ରଦ୍ଦ କରାନଯିବ ସେ ନେଇ ବାଚସ୍ପତିଙ୍କ ପାଖରେ ବିଜେଡି ଆବେଦନ କରିବ ବୋଲି ସେ କହିଛନ୍ତି ।
ଆଗକୁ ପଞ୍ଚାୟତ ଓ ପୌର ନିର୍ବାଚନ ଥିବା ବେଳେ ବିଜେଡିରେ ନିଲମ୍ବନ ଓ ଇସ୍ତଫା ପର୍ବ ସୁପ୍ରିମୋଙ୍କ ପାଇଁ ଟେନସନ ବଢ଼ାଇଛି । ବିଶେଷ କରି ରାଜ୍ୟସଭା ନିର୍ବାଚନ ବିଗାଡି ଦେଇଛି ବିଜେଡିର ସବୁ ଅଙ୍କ । ଆଗକୁ ଏହା କେଉଁ ମୋଡ଼ ନେଉଛି ତାଉପରେ ନଜର।