କଟକ, ସେପ୍ଟେମ୍ବର ୧୫: ବାରବାଟୀରେ ଆରମ୍ଭ ହେବାକୁ ଯାଉଛି ଓଡ଼ିଶା T20 ଲିଗ୍–CM ଟ୍ରଫି। ଟୁର୍ଣ୍ଣାମେଣ୍ଟକୁ ନେଇ ରାଜ୍ୟର କ୍ରିକେଟ୍ ମହଲରେ ଏବେଠାରୁ ଉତ୍ସାହ ଦେଖାଦେଇଛି। ସେପ୍ଟେମ୍ବର ୨୦ରୁ ୨୯ ଯାଏ କଟକର ବାରବାଟୀ ଷ୍ଟାଡିୟମ୍ରେ ଏହି ପ୍ରତିଯୋଗିତା ଖେଳାଯିବ। ଲିଗ୍ରେ ୬ଟି ଦଳ ଟ୍ରଫି ପାଇଁ ପ୍ରତିଦ୍ୱନ୍ଦ୍ୱିତା କରିବେ। ଭୁବନେଶ୍ୱର ଟାଇଗର୍ସ, ପୁରୀ ଟାଇଟାନ୍ସ, କେନ୍ଦୁଝର ମାଇନର୍ସ, ରାଉରକେଲା ସୁପରଷ୍ଟାର୍ସ, ସମ୍ବଲପୁର ୱାରିଅର୍ସ ଓ କଟକ ପାନ୍ଥର୍ସ ମଧ୍ୟରେ ହେବ ରୋମାଞ୍ଚକର ଲଢ଼େଇ। ମୋଟ ୧୭ଟି ମ୍ୟାଚ୍ ଖେଳାଯିବ। ଲିଗ୍କୁ କେବଳ ଏକ T20 ପ୍ରତିଯୋଗିତା ଭାବେ ନୁହେଁ, ବରଂ ରାଜ୍ୟର ଯୁବ କ୍ରିକେଟରଙ୍କ ପାଇଁ ବଡ଼ ସୁଯୋଗ ଭାବେ ଦେଖୁଛି ଓଡ଼ିଶା କ୍ରିକେଟ୍ ଆସୋସିଏସନ୍। OCA ସଭାପତି ପଙ୍କଜ ଲୋଚନ ମହାନ୍ତିଙ୍କ ମତରେ, ଏହି ଲିଗ୍ ଖେଳାଳିମାନଙ୍କୁ ପ୍ରତିଦ୍ୱନ୍ଦ୍ୱିତାମୂଳକ T20 କ୍ରିକେଟ୍ରେ ନିଜକୁ ପ୍ରମାଣ କରିବାର ଅବସର ଦେବ। ତାଙ୍କ କହିବା ଅନୁସାରେ, ମ୍ୟାଚ୍ ସମୟରେ ଚାପକୁ ସମ୍ଭାଳିବା, ନିଷ୍ପତ୍ତି ନେବା ଏବଂ ଉଚ୍ଚସ୍ତରୀୟ କ୍ରିକେଟ୍ ପାଇଁ ଆବଶ୍ୟକ ଅଭିଜ୍ଞତା ହାସଲ କରିବାରେ ଲିଗ୍ ଯୁବ ଖେଳାଳିଙ୍କୁ ସହାୟତା କରିବ। ଓଡ଼ିଶାର କ୍ରିକେଟ୍ ଭିତ୍ତିଭୂମିକୁ ଆହୁରି ସୁଦୃଢ଼ କରିବା ସହ ନୂଆ ପ୍ରତିଭାଙ୍କୁ ଆଗକୁ ଆଣିବା ଉପରେ OCA ଗୁରୁତ୍ୱ ଦେଉଛି। OCA ସମ୍ପାଦକ ସଞ୍ଜୟ ବେହେରା ମଧ୍ୟ ଲିଗ୍ର ଗୁରୁତ୍ୱ ଉପରେ ମତ ରଖିଛନ୍ତି। ତାଙ୍କ ଅନୁସାରେ, ଘରୋଇ ସ୍ତରରେ ନିୟମିତ ଭାବେ ଏଭଳି ପ୍ରତିଯୋଗିତା ହେଲେ ଯୁବ କ୍ରିକେଟରମାନେ ଅଭିଜ୍ଞ ଖେଳାଳିଙ୍କ ସହ ଖେଳି ଅନେକ କିଛି ଶିଖିପାରିବେ। ଏହା ସେମାନଙ୍କୁ ଭବିଷ୍ୟତରେ ବଡ଼ ମଞ୍ଚ ପାଇଁ ପ୍ରସ୍ତୁତ କରିବ। ଏଥର ଲିଗ୍ର ଆଉ ଏକ ବିଶେଷ ଆକର୍ଷଣ ହେବ ମହିଳା କ୍ରିକେଟ୍ର ପ୍ରଦର୍ଶନୀ ମ୍ୟାଚ୍। ଟୁର୍ଣ୍ଣାମେଣ୍ଟର ଅନ୍ତିମ ଦିନରେ ଏହି ମ୍ୟାଚ୍ ଆୟୋଜନ କରାଯିବ। ଏହା ମହିଳା କ୍ରିକେଟରଙ୍କୁ ବାରବାଟୀ ଭଳି ବଡ଼ ମଞ୍ଚରେ ନିଜ ପ୍ରତିଭା ଦେଖାଇବାର ସୁଯୋଗ ଦେବ। ୬ଟି ଦଳ, ୧୭ଟି ମ୍ୟାଚ୍ ଏବଂ ଅନେକ ଉଦୀୟମାନ ଖେଳାଳିଙ୍କୁ ନେଇ ଏଥରର ଓଡ଼ିଶା T20 ଲିଗ୍ ରୋମାଞ୍ଚକର ହେବ ବୋଲି ଆଶା କରାଯାଉଛି। ବିଶେଷକରି ଯୁବ କ୍ରିକେଟରଙ୍କ ପାଇଁ ଏହି ଲିଗ୍ ନିଜ ଦକ୍ଷତା ଦେଖାଇବା ସହ ଚୟନକର୍ତ୍ତାଙ୍କ ନଜରକୁ ଆସିବାର ଏକ ଗୁରୁତ୍ୱପୂର୍ଣ୍ଣ ମଞ୍ଚ ହୋଇପାରେ। ବାରବାଟୀରେ ଟୁର୍ଣ୍ଣାମେଣ୍ଟ ଆରମ୍ଭକୁ ଆଉ କିଛି ଦିନ ଥିବାରୁ ଦଳଗୁଡ଼ିକ ମଧ୍ୟ ପ୍ରସ୍ତୁତିକୁ ଜୋରଦାର କରିଛନ୍ତି। ନିଜ ନିଜ ଦଳର ପ୍ରଦର୍ଶନ ସହ ନୂଆ ପ୍ରତିଭାମାନେ କିଭଳି ଖେଳ ଦେଖାଉଛନ୍ତି, ତାହା ଉପରେ ଏବେ କ୍ରିକେଟ୍ପ୍ରେମୀଙ୍କ ନଜର। ଓଡ଼ିଶାର ଘରୋଇ କ୍ରିକେଟ୍କୁ ନୂଆ ଗତି ଦେବାରେ ଏହି ଲିଗ୍ ଗୁରୁତ୍ୱପୂର୍ଣ୍ଣ ଭୂମିକା ନେବ ବୋଲି ଆଶା ରହିଛି। Post navigation ତେଲକୋଇ ବିଧାୟକଙ୍କ ସୁରକ୍ଷା ନେଇ ଉଠିଲା ପ୍ରଶ୍ନ ଏପ୍ରିଲରେ ପୁଣି ଖୋଲିବ ସୁଭଦ୍ରା ପୋର୍ଟାଲ
